एमाले अध्यक्ष ओली प्रधानमन्त्री नियुक्त

एमाले अध्यक्ष केपी शर्मा ओली चौथो पटक प्रधानमन्त्रीमा नियुक्त हुनुभएको छ । एमाले संसदीय दलका नेता समेत रहेका अध्यक्ष ओलीलाई राष्ट्रपति रामचन्द्र पौडेलले संविधानको धारा ७६ (२) अनुसार प्रधानमन्त्री नियुक्त गर्नुभएको हो ।
प्रतिनिधि सभाका सदस्य केपी शर्मा ओलीलाई राष्ट्रपति पौडेलद्धारा प्रधानमन्त्री पदमा नियुक्त गरिएको राष्ट्रपति कार्यालयका प्रवक्ता शैलजा रेग्मी भट्टराईले जारी गर्नुभएको विज्ञप्तिमा उल्लेख छ ।
नेपाली कंग्रेस र एमालेबीच नयाँ सत्ता समिकरण बनेपछि ओली मुलुकको कार्यकारी प्रमुखमा चौथो पटक नियुक्त हुनुभएको हो । माओवादी केन्द्रका अध्यक्ष पुष्पकमल दाहालले गत असार २८ गते शुक्रबार प्रधानमन्त्रीको रूपमा प्रतिनिधि सभाबाट विश्वास गुमाउनु भएको थियो । संघीय संसदमा उपस्थित २५८ सांसदमध्ये दाहालले पेस गर्नुभएको विश्वासको मतको पक्षमा ६३ र विपक्षमा १९४ मत परेको थियो ।
प्रचण्डले सदनबाट प्रधानमन्त्री पद गुमाएलगत्तै राष्ट्रपति पौडेलले शुक्रबार नै प्रधानमन्त्रीमा दाबी पेस गर्न आह्वान गर्नुभएको थियो ।
प्रधानमन्त्रीमा नियुक्त ओलीले पद तथा गोपनीयताको सपथ भने सोमबार विहान ११ वजे लिनुहुने राष्ट्रपतिको कार्यलयले जनाएको छ । कंग्रेस र एमालेबीच मन्त्रालय भागवण्डामा सहमति समेत भईसकेकाले भोली नै मन्त्रिपरिषद गठन हुने छ । कंग्रेस र एमालेले आफ्नो भागमा परेका मन्त्रीहरुको समेत टुङगो लगाएका छन ।
प्रधानमन्त्रीमा चौथो कार्यकालका लागि नियुक्त हुनुभएका अध्यक्ष ओली यसअघि २०७२ असोज २५ मा प्रथम पटक प्रधानमन्त्रीमा नियुक्त हुनुभएको थियो । सो कार्यकाल करिब १० महिना अर्थात् २०७३ साउन १९ गतेसम्म कायम रह्यो । त्यस्तै, दोस्रो पटक ओली २०७४ फागुन ३ गते प्रधानमन्त्रीमा नियुक्त हुनुभएको थियो । सो कार्यकाल ३ वर्ष ९ महिना अर्थात् २०७८ वैशाख ३० गतेसम्म कायम रह्यो ।
सोहीअनुसार प्रधानमन्त्रीमा उहाँको तेस्रो कार्यकाल २०७८ वैशाख ३० देखि २०७८ असार २९ अर्थात् दुई महिना प्रधानमन्त्रीमा कायम रहनुभयो । तत्कालीन नेकपामा विभाजन आएपछि उहाँ पुनः प्रधानमन्त्रीमा नियुक्त हुनुभएको थियो । अहिले चौथो कार्यकालका लागि २०८१ असार ३० गते उहाँ प्रधानमन्त्रीमा नियुक्त हुनुभएको हो ।
प्रधानमन्त्रीमा नियुक्त ७१ वर्षीय ओलीको राजनीतिक सङ्घर्ष लामो छ । वि.सं. २००८ साल फागुन ११ गते तेह्रथुमको आठराई इवा गाउँको एक किसान परिवारमा जन्मनुभएका ओली पटक–पटक गरी १४ वर्षसम्म जेल बस्नुभएको छ । उहाँको खास नाम खड्गप्रसाद ओली भए पनि राजनीतिमा उहाँलाई केपी शर्मा ओलीको नामले चिनिन्छ ।