काठमाडौं । पाकिस्तानमा चिनियाँ नागरिकमाथि बढ्दो आतंकवादी हमलाले चीनको तनाव बढाएको छ । चीनले अब चीन-पाकिस्तान इकोनोमिक कोरिडोर (सीपीईसी) परियोजनामा संलग्न इन्जिनियरहरू र कामदारहरूको सुरक्षाका लागि आफ्नो सेना तैनाथ गर्ने विचार गरिरहेको छ।
यसका लागि चीनले निजी सुरक्षा र सैन्य सम्झौतामा हस्ताक्षर गरेको छ। चीनले पाकिस्तानमा रहेका चिनियाँ नागरिकको सुरक्षाका लागि संयुक्त सुरक्षा प्रबन्धका लागि डेवे सेक्युरिटी फ्रन्टियर सर्भिस ग्रुप, चाइना ओभरसीज सेक्युरिटी ग्रुप र ह्वाक्सिन झोङ्शान सेक्युरिटी सर्भिस गरी तीनवटा निजी कम्पनीलाई नियुक्त गरेको छ।
यसअघि पनि पाकिस्तानमा चिनियाँ नागरिकमाथि धेरै आक्रमण भएका थिए । सबैभन्दा पछिल्लो हमला ६ अक्टोबरमा भएको थियो जसमा दुई चिनियाँ नागरिक बलूच लिबरेसन आर्मी (बीएलए)द्वारा आत्मघाती बम विष्फोटमा मारिएका थिए। जसका कारण पाकिस्तानमा रहेका चिनियाँ नागरिकको सुरक्षाको चिन्ता बढेको छ ।
खुफिया रिपोर्टहरूले चीनले सीपीइसी परियोजनाहरूमा संलग्न आफ्ना नागरिकहरूको सुरक्षा गर्न पाकिस्तानमा आफ्नै सेना तैनाथ गर्न सक्ने सुझाव दिएका छन् ।
चीनको बढ्दो चिन्तापछि पाकिस्तानले पनि आफ्नो सुरक्षा बजेट बढाएको छ । अगस्टमा पाकिस्तानले आफ्नो २.१ ट्रिलियन रुपैयाँ रक्षा बजेट अन्तर्गत “अपरेशन आजम-ए-इस्तिखम” को लागि ६० अर्ब रुपैयाँ विनियोजन गरेको छ।
हालै चीन सरकारको अनुरोधमा पाकिस्तानले सीपीइसी फेज-२ परियोजनासँग सम्बन्धित चिनियाँ नागरिक र उनीहरूको सम्पत्तिको सुरक्षाका लागि थप ९० अर्ब रुपैयाँ स्वीकृत गरेको छ।
चीनले राम्रो सुरक्षा उपायहरूको लागि दबाब बढाउँदैछ । उसले सीपीइसीमा काम गर्ने आफ्ना नागरिकहरूको सुरक्षा गर्न पाकिस्तानसँग संयुक्त सुरक्षा कम्पनी स्थापना गर्ने प्रस्ताव गरेको छ। यसले बलुचिस्तान जस्ता क्षेत्रहरूमा चीनको बढ्दो उपस्थितिको अनुमानलाई बढाएको छ ।
यहाँ पृथकतावादी लडाकुहरूले सक्रिय रूपमा चिनियाँ हितलाई लक्षित गरिरहेका छन्। यसका साथै चीनले पाकिस्तानसँग आतंकवाद विरोधी सहयोगमा सम्झौता गर्न सुझाव दिएको छ । यसपछि पाकिस्तानमा चिनियाँ लगानी र चिनियाँ नागरिकको सुरक्षाका लागि चिनियाँ सेनाको सम्भावित आधिकारिक उपस्थितिमा प्रश्न उठिरहेको छ ।
