चितवन — चितवन राष्ट्रिय निकुञ्जले गत आर्थिक वर्षमा निकुञ्जसम्बन्धी विभिन्न अपराधमा संलग्न ४४२ जनालाई पक्राउ गरी कारबाही गरेको छ। पक्राउ परेका व्यक्तिहरूमध्ये २६६ जना वनसम्बन्धी र १७६ जना वन्यजन्तुसम्बन्धी अपराधमा संलग्न रहेको निकुञ्जका सूचना अधिकारी अविनास थापा मगरले जानकारी दिए।
निकुञ्जले गैँडा सम्बन्धी मुद्दामा ८, बाघमा १, बँदेलमा २६, सालकमा ५, च्याउमा ४, चितुवा ५, हिउँचितुवा २, र पन्क्षीसम्बन्धी मुद्दामा ३ जनालाई पक्राउ गरेको छ। त्यस्तै, माछा चोरी शिकारीमा १२६, ढुंगा-गिटी, बालुवा तस्करीमा ५, घाँसदाउँरा संकलनमा १४१ र निगुरो संकलनमा ८७ जनालाई कारबाही गरिएको छ।
निकुञ्जभित्र अनुमति बिना प्रवेश गर्ने २३ जनामाथि र निषेधित क्षेत्रमा प्रवेश गर्ने ६ जनामाथि पनि कारबाही गरिएको छ।
थापा मगरका अनुसार पक्राउ परेकाविरुद्ध २६ वटा मुद्दा दर्ता भएका छन्, जसमध्ये ४ वटा जिल्ला अदालतमा र बाँकी निकुञ्ज कार्यालयमै दर्ता गरिएका छन्। अदालतमा रहेका मुद्दाहरू सालक, गैँडा र बाघसम्बन्धी रहेका छन्।
गत वर्ष दर्ता गरिएका मुद्दामध्ये १४ वटा मुद्दाको फैसला भइसकेको छ। साथै, अघिल्लो आर्थिक वर्षबाट सरेका २७ मुद्दासमेत समेटेर हालसम्म निर्णय भएको निकुञ्जले जनाएको छ। चालु आर्थिक वर्षका लागि थप २६ वटा मुद्दा जिम्मेवारीमा आएका छन्।
