काठमाडौँ। सरकारले क्यासिनो नियमनमा कडाइ गर्दै ‘क्यासिनो नियमावली–२०८२’ जारी गरेको छ। अब अन्तर्राष्ट्रिय सीमा क्षेत्रबाट पाँच किलोमिटरभित्र नयाँ क्यासिनो दर्ता गर्न नपाइनेछ। यसअघि यो दूरी तीन किलोमिटर मात्र थियो। पाँच किलोमिटरभित्र पहिल्यै सञ्चालनमा रहेका क्यासिनोहरूलाई भने सर्तसहित सञ्चालनको छुट दिइएको छ।
नियमावलीअनुसार ठूलो क्यासिनो सञ्चालन गर्न ३० करोड र सानोका लागि २० करोड चुक्ता पुँजी आवश्यक हुनेछ। साथै, ठूलो क्यासिनोले ३ करोड र सानोले १ करोड ५० लाख इजाजत दस्तुर तिर्नुपर्नेछ। नवीकरण शुल्क पनि वृद्धि गरिएको छ।
विदेशी पर्यटकको प्रवेशमा कडाइ गर्दै उनीहरूको अभिलेख पाँच वर्षसम्म राख्नुपर्ने व्यवस्था गरिएको छ। नेपाली कर्मचारीले परिचयपत्र देखाएर मात्र प्रवेश गर्न पाउने छन्। २५ लाखभन्दा बढीको जित-हारको विवरण पर्यटन विभाग र राष्ट्र बैंकलाई २४ घण्टाभित्र दिनुपर्नेछ।
सीमा क्षेत्रमा सक्रिय धेरै क्यासिनो नयाँ नियमअनुसार दूरी मापदण्डमा नपर्ने देखिए पनि निगरानी र कार्यान्वयनमा अझै चुनौती देखिएको छ।
