अमेरिकामा जेलभित्र मृत फेला परेका अमेरिकी वित्तीय कारोबारी तथा यौन अपराध अभियुक्त जेफ्री एपस्टिनको भनिएको ‘सुसाइड नोट’ सार्वजनिक गरिएको छ ।
बालिकाहरूलाई यौन शोषण तथा वेश्यावृत्तिमा संलग्न गराएको आरोपमा मुद्दा सामना गरिरहेका एपस्टिन सन् २०१९ मा न्यूयोर्कस्थित जेलमा मृत भेटिएका थिए। अमेरिकी अधिकारीहरूले त्यसलाई आत्महत्या भनेका थिए, यद्यपि घटनाबारे विभिन्न विवाद र अड्कलबाजी लामो समयदेखि भइरहेका छन् ।
अमेरिकी अदालतले बुधबार सार्वजनिक गरेको हस्तलिखित नोट यसअघि गोप्य अदालत अभिलेखमा राखिएको थियो। उक्त नोट एपस्टिनसँग जेल कोठा साझा गरेका पूर्व प्रहरी अधिकारी निकोलस टार्टाग्लियोनसँग सम्बन्धित मुद्दाको कागजातभित्र रहेको बताइएको छ।
अमेरिकी अखबार न्युयोर्क टाइम्सको अनुरोधपछि संघीय न्यायाधीश केनेथ करासले नोट सार्वजनिक गर्न आदेश दिएका हुन् ।
रिपोर्टअनुसार नोटमा “उनीहरूले मलाई महिनौं जाँच गरे, केही पनि फेला पारेनन्” भन्ने आशयको वाक्य लेखिएको छ। त्यसैगरी “आफ्नो विदाइको समय आफैं छान्न पाउनु अवसर हो” भन्ने वाक्य पनि उल्लेख गरिएको छ ।
तर उक्त नोटमा हस्ताक्षर नभएको र आधिकारिक रूपमा प्रमाणीकरण नभएको विवरण पनि सार्वजनिक गरिएको छ ।
टार्टाग्लियोनले उक्त नोट जेलको एउटा ग्राफिक उपन्यासभित्र फेला पारेको दाबी गरेका छन्। अदालतका कागजातअनुसार नोटको मूल प्रति सन् २०२१ मा अदालतलाई बुझाइएको थियो ।
यस विषयलाई लिएर अमेरिकामा फेरि बहस सुरु भएको छ। एपस्टिनको मृत्यु आत्महत्या हो वा होइन भन्ने विषयमा विगतदेखि नै विभिन्न षड्यन्त्र सिद्धान्तहरू सार्वजनिक हुँदै आएका छन्। तर अमेरिकी न्याय विभागले आधिकारिक रूपमा उनको मृत्यु आत्महत्या भएको निष्कर्ष सार्वजनिक गरिसकेको छ ।
एपस्टिनमाथि प्रभावशाली राजनीतिज्ञ, व्यवसायी तथा सार्वजनिक व्यक्तिहरूसँग सम्बन्ध रहेको आरोप र चर्चा विगतदेखि हुँदै आएको थियो। यद्यपि विभिन्न व्यक्तिहरूको नाम सार्वजनिक बहसमा आए पनि सबै आरोप अदालतबाट प्रमाणित भएका छैनन् ।
