चालु आर्थिक वर्षको पहिलो नौ महिनामा वीरगन्ज नाका हुँदै रु २६ अर्ब १३ करोड बराबरका सवारीसाधन तथा तिनका पार्टपुर्जा आयात भएका छन्। यो गत आर्थिक वर्षको सोही अवधिको तुलनामा रु ६ अर्ब ९४ करोड अर्थात् ३६.१९ प्रतिशतले बढी हो।
गत आर्थिक वर्षको पहिलो नौ महिनामा वीरगन्ज नाका हुँदै रु १९ अर्ब १९ करोड बराबरका सवारीसाधन तथा पार्टपुर्जा आयात भएका थिए।
वीरगन्ज भन्सार कार्यालयका सूचना अधिकारी उदयसिंह विष्टका अनुसार चालु आवमा सवारीसाधन तथा पार्टपुर्जाको आयात उल्लेखनीय रूपमा बढेको छ। यस अवधिमा सवारीसाधन तथा पार्टपुर्जाबाट मात्रै रु १८ अर्ब २२ करोड राजस्व सङ्कलन भएको छ, जुन गत वर्षको सोही अवधिको रु १४ अर्ब ८४ करोड भन्दा उल्लेख्य बढी हो।
चालु आवको नौ महिनामा रु ६ अर्ब ४२ करोड मूल्यका ४५ हजार ६२० वटा मोटरसाइकल (अन एसेम्बल्ड) आयात भएका छन्। गत वर्षको सोही अवधिमा रु ४ अर्ब ६७ करोड मूल्यका ३५ हजार ७९९ वटा मोटरसाइकल आयात भएका थिए।
यस अवधिमा रु २ अर्ब ४ करोड मूल्यका २१ हजार ६३९ वटा ट्याक्टर तथा टिलर आयात भएका छन्। गत वर्षको सोही अवधिमा भने रु १ अर्ब ३५ करोड मूल्यका १३ हजार ८६१ वटा मात्रै आयात भएका थिए।
इन्धनबाट चल्ने जीप, कार र भ्यानको आयात भने घटेको छ। चालु आवको नौ महिनामा रु १ अर्ब १७ करोड मूल्यका ५९१ वटा यस्ता सवारी आयात भएका छन्। गत वर्षको सोही अवधिमा रु १ अर्ब ६६ करोड मूल्यका ८०५ वटा आयात भएका थिए।
विद्युतीय सवारीसाधन (EV) आयातमा भने उल्लेखनीय वृद्धि देखिएको छ। चालु आवको नौ महिनामा रु २ अर्ब ९८ करोड मूल्यका विद्युतीय सवारीसाधन आयात भएका छन्, जुन गत वर्षको सोही अवधिको तुलनामा १०२ प्रतिशतले बढी हो।
गत वर्ष सोही अवधिमा रु १ अर्ब ४८ करोड बराबरका विद्युतीय सवारीसाधन आयात भएका थिए।
त्यसमध्ये रु १ अर्ब ४६ करोड मूल्यका ४९३ वटा विद्युतीय जीप, कार र भ्यान आयात भएका छन्। गत वर्ष सोही अवधिमा रु ४८ करोड मूल्यका १७२ वटा मात्रै विद्युतीय जीप, कार र भ्यान आयात भएका थिए।
भन्सार तथ्यांकले नेपालमा विद्युतीय सवारीसाधनप्रति उपभोक्ताको आकर्षण तीव्र रूपमा बढिरहेको संकेत गरेको छ। इन्धनचालित सवारीको आयात घट्दै जाँदा EV आयातमा भएको दोब्बर वृद्धि बजारको बदलिँदो प्रवृत्तिको संकेतका रूपमा हेरिएको छ।
