धनगढी — सुदूरपश्चिमको कञ्चनपुरमा रहेको शुक्लाफाँटा राष्ट्रिय निकुञ्जमा पाटे बाघको सङ्ख्या ४३ पुगेको छ।
विश्व बाघ दिवसको अवसरमा आयोजित कार्यक्रममा सार्वजनिक अनुगमन प्रतिवेदन अनुसार, २०८१ सालको कार्तिक १८ देखि पुष १० सम्म गरिएको विस्तृत अनुगमनबाट २१ भाले, १९ पोथी र ३ अनकैमेरा बाघसहित कुल ४३ पाटे बाघ फेला परेका हुन्। यो गणना सरकारद्वारा जारी बाघ तथा आहारा प्रजाति अनुगमन प्रोटोकल अनुसार गरिएको हो।
कार्यक्रममा निकुञ्जका संरक्षण अधिकृत, नेपाली सेना, संरक्षणकर्मी तथा विभिन्न संस्थाका प्रतिनिधिको उपस्थिति थियो। शुक्लाफाँटा राष्ट्रिय निकुञ्ज सुरुमा १५५ वर्ग किमीमा स्थापना भई हाल ३०५ वर्ग किमीमा विस्तार भएको छ। निकुञ्जको करिब ५२ प्रतिशत भाग साल वन र १९ प्रतिशत घाँसे मैदानले ढाकेको छ।
यहाँ जङ्गली हात्ती, गैँडा, बाघ, बाह्रसिङ्गा, सुनगोहोरोजस्ता दुर्लभ वन्यजन्तु तथा ४६४ प्रजातिका चराचुरुङ्गी पाइन्छन्। संरक्षणमा स्थानीयको सहभागिता सुनिश्चित गर्न वरपरको क्षेत्र २०६१ सालमा २४३.५ वर्ग किमीको मध्यवर्ती क्षेत्र घोषणा गरिएको थियो। हाल स्वीकृत व्यवस्थापन योजना कार्यान्वयनमा छ।
