काठमाडौँ। उद्योग, वाणिज्य तथा आपूर्तिमन्त्री दामोदर भण्डारीले खुला सीमाका कारण नेपालले ठूलो मात्रामा राजस्व गुमाइरहेको भन्दै चिन्ता व्यक्त गरेका छन्।
मंगलबार राजधानीमा आयोजित ‘३१ औँ कार्गो डे’ कार्यक्रमलाई सम्बोधन गर्दै मन्त्री भण्डारीले भारतसँगको खुला सीमा सुरक्षा चुनौतीमा परिणत भएको उल्लेख गरे।
उनले भने, “खुला सीमाका कारण चोरी निकासी भइरहेको छ, जसका कारण करोडौं राजस्व गुमिरहेको छ। यसले देशको अर्थतन्त्रमा नकारात्मक असर पारिरहेको छ। सरकार यस विषयमा गम्भीर छ र चोरी निकासी रोक्ने उपायतर्फ प्रतिबद्ध छ।”
मन्त्री भण्डारीका अनुसार सरकार अब भन्सार बिन्दुहरूलाई सशक्त बनाएर समानहरूको आयात–निर्यातलाई वैधानिक बाटोबाट मात्र सञ्चालन गर्नतर्फ सक्रिय हुँदैछ।
उनले निकासी–पैठारी सम्बन्धी पुराना कानुनहरू सुधार गर्न आवश्यक ठहर गर्दै संसदमा सम्बन्धित कानुन संशोधनको प्रस्ताव समेत दर्ता भइसकेको जानकारी दिए।
भण्डारीले व्यापार प्रवाहलाई सहज बनाउन भन्सार प्रणाली सुधार, ढुवानी पूर्वाधार विकास, र अन्तरदेशीय व्यापार सहजीकरणमा सरकारले प्राथमिकता दिएको पनि बताए।
