टाइटानिक दुर्घटनासँग सम्बन्धित ऐतिहासिक वस्तुहरूको अझै पनि ठूलो मूल्य रहँदै आएको छ । जसका कारण यस्ता सामानहरू लिलामीमा अत्यन्त महँगो मूल्यमा बिक्री भइरहेका छन्। आर.एम.एस. टाइटानिक १९१२ को अप्रिल १० मा आफ्नो पहिलो यात्रामा निस्किएको थियो । त्यतिबेला यसलाई “डुब्न नसक्ने जहाज” मानिन्थ्यो। तर, १४ अप्रिल १९१२ को रात उत्तरी एटलान्टिक महासागरमा बरफको पहाडसँग ठोक्किएपछि यो जहाज डुबेको थियो । जहाजमा करिब २२०० जना यात्रु सवार थिए। त्यो दुर्घटनामा बाँचेकी एकजना महिलाले प्रयोग गरेको लाइफ ज्याकेट लिलामीमा करिब ६ लाख ७० हजार पाउण्डमा बिक्री भएको छ। यो लाइफ ज्याकेट पहिलो श्रेणीकी यात्रु लौरा माबे फ्रान्काटेली ले लाइफबोट नम्बर १ मा बस्दा लगाउनुभएको थियो। त्यसैगरी, एकजना व्यवसायी इसिडोर स्टारवसको खल्तीमा भेटिएको घडी पनि करिब १ लाख ८० हजार पाउण्डमा बिक्री भएको छ।