परराष्ट्रमन्त्री शिशिर खनालले नेपाल–भारतबीचका सीमा विवादहरू कूटनीतिक वार्ता र संवादमार्फत समाधान गर्न नेपाल पूर्ण रूपमा प्रतिबद्ध रहेको स्पष्ट पार्नुभएको छ।
भारत भ्रमणमा रहनुभएका मन्त्री खनालले आज नयाँ दिल्लीस्थित नेपाली दूतावासमा आयोजित पत्रकार सम्मेलनमा बोल्दै नेपाल–भारतबीच देखिएका सीमासम्बन्धी समस्याहरूलाई आपसी समझदारी र कूटनीतिक संयन्त्रमार्फत समाधान गर्न नेपाल सधैं तयार रहेको बताउनुभयो।
उहाँले एक प्रश्नको जवाफमा लिपुलेक, लिम्पियाधुरा र कालापानी नेपाली भूमि भएको दोहोर्याउँदै यस सम्बन्धमा नेपालले भारत र चीन दुवै पक्षसमक्ष आफ्नो आधिकारिक धारणा स्पष्ट रूपमा प्रस्तुत गरिसकेको जानकारी दिनुभयो।
“नेपाल–भारतबीचको वर्तमान सीमा सन् १८१६ को सुगौली सन्धिबाट निर्धारित भएको हो। यी विषयहरू द्विपक्षीय वार्ता र कूटनीतिक संयन्त्रमार्फत नै समाधान गरिनेछन्। हामी सीमा विवादलाई शान्तिपूर्ण कूटनीतिक प्रक्रियाबाट समाधान गर्न चाहन्छौँ,” मन्त्री खनालले भन्नुभयो।
उहाँले दुई देशका प्रधानमन्त्रीको सहमतिमा गठन गरिएको नेपाल–भारत प्रबुद्ध व्यक्ति समूह (इपिजी) को प्रतिवेदन दुवै सरकारलाई बुझाउनुपर्ने आवश्यकता पनि औँल्याउनुभयो।
अर्को प्रश्नको जवाफमा परराष्ट्रमन्त्री खनालले नेपालले आफ्ना दुवै छिमेकी मुलुकसँग सन्तुलित र सहकार्यपूर्ण सम्बन्ध अघि बढाइरहेको बताउनुभयो।
उहाँले नेपालको परराष्ट्र नीतिका प्राथमिकता, नेपाल–भारत सम्बन्ध तथा अन्तर्राष्ट्रिय समुदायसँग नेपालको संलग्नताबारे पनि स्पष्ट पार्नुभयो।
यसैबीच, नेपाली दूतावासले पत्रकारहरूको सहभागिताप्रति आभार व्यक्त गर्दै नेपाल–भारतबीचको आपसी समझदारी तथा सहकार्यलाई अझ सुदृढ बनाउन आगामी दिनमा निरन्तर संवाद र सहकार्य आवश्यक रहेको जनाएको छ।
