बुटवल, लुम्बिनी क्षेत्रलाई सूचना प्रविधिको केन्द्रका रूपमा विकास गर्ने लक्ष्यसहित बुटवलमा लुम्बिनी टेक इनोभेसन सेन्टरको औपचारिक उद्घाटन गरिएको छ। सिद्धार्थ कटेजमा आयोजित समारोहमा सेन्टरलाई टेकपाइला इनोभेसन्सको आधिकारिक व्यवसाय–देखि–ग्राहक (बी–टु–सी) साझेदारका रूपमा सार्वजनिक गरिएको हो।
सेन्टरका संस्थापक अध्यक्ष धनबहादुर रानाको अध्यक्षतामा सम्पन्न कार्यक्रममा कृत्रिम बौद्धिकता, साइबर सुरक्षा र डाटा विज्ञानका तालिम सञ्चालन गर्ने योजना प्रस्तुत गरिएको थियो। साथै सफ्टवेयर तथा मोबाइल एप विकास, साइबर सुरक्षा परामर्श, डाटा सुरक्षा, सूचना प्रविधि इन्क्युबेसन र स्टार्टअप प्रवर्द्धनसम्बन्धी सेवा प्रदान गरिने जानकारी दिइयो।
कार्यक्रमका प्रमुख अतिथि नेपाल चेम्बर अफ कमर्स बुटवल–रुपन्देहीका कार्यवाहक महासचिव शिव ज्ञवालीले स्थानीय युवालाई आधुनिक प्रविधिमा दक्ष बनाई रोजगारी र उद्यमशीलता प्रवर्द्धन गर्न सेन्टरले महत्त्वपूर्ण भूमिका खेल्ने विश्वास व्यक्त गर्नुभयो।
कार्यक्रममा टेकपाइला इनोभेसन्सका एसोसिएट डाइरेक्टर चिरञ्जीवी अधिकारीले लुम्बिनी टेक इनोभेसन सेन्टरलाई आधिकारिक बी–टु–सी साझेदारी प्रमाणपत्र हस्तान्तरण गर्नुभयो। कार्यक्रममा विभिन्न शैक्षिक संस्था, सूचना प्रविधि क्षेत्रका विज्ञ, उद्योगी–व्यवसायी तथा क्यान महासंघका पदाधिकारीहरूले सेन्टरको सफलताको शुभकामना व्यक्त गरेका थिए।
