अमेरिकी राष्ट्रपति डोनाल्ड ट्रम्पले सन् २०२५ मा परिवारसँग सम्बन्धित क्रिप्टोकरेन्सी व्यवसायबाट करिब एक अर्ब अमेरिकी डलर बराबरको आम्दानी गरेको विवरण सार्वजनिक भएको छ। अमेरिकी सरकारी नैतिकता कार्यालयले सार्वजनिक गरेको ९२७ पृष्ठीय आर्थिक विवरणले ट्रम्पको सम्पत्तिमा पछिल्ला दुई वर्षमा उल्लेखनीय वृद्धि भएको देखाएको हो।
फोर्ब्सका अनुसार सन् २०२४ मा करिब २ अर्ब ३० करोड डलर रहेको ट्रम्पको कुल सम्पत्ति सन् २०२६ सम्म आइपुग्दा ६ अर्ब ५० करोड डलर पुगेको छ। यसको प्रमुख कारण वर्ल्ड लिबर्टी फाइनान्सियल र ट्रम्पसँग जोडिएको क्रिप्टोकरेन्सी कारोबारबाट प्राप्त आम्दानी रहेको जनाइएको छ।
आर्थिक विवरणअनुसार ट्रम्पले वर्ल्ड लिबर्टी फाइनान्सियलसँगको सम्बन्धबाट करिब ५ करोड ५० लाख डलर आम्दानी गर्नुभएको छ। त्यस्तै, जनवरी २०२५ मा सार्वजनिक गरिएको ट्रम्प ब्रान्डको क्रिप्टोकरेन्सीसँग सम्बन्धित इजाजतपत्र सम्झौताबाट मात्रै ६३ करोड ५० लाख डलर रोयल्टी प्राप्त भएको उल्लेख छ।
उक्त कम्पनी सन् २०२४ को सेप्टेम्बरमा ट्रम्पका छोराहरू र मध्यपूर्वका लागि अमेरिकी विशेष दूत स्टिभ विटकफका छोराले संयुक्त रूपमा स्थापना गरेका थिए। कम्पनीले डब्लुएलएफआई (WLFI) टोकन बिक्रीबाट ५५ करोड डलर उठाएको थियो। कारोबार सुरु हुँदा ४६ सेन्ट रहेको टोकनको मूल्य अहिले करिब ६ सेन्ट मा झरेको छ।
ट्रम्प र उहाँका तीन छोराले डीटी मार्क्स डेफीमार्फत थप २२ अर्ब ५० करोड WLFI टोकन प्राप्त गरेका छन्, जसको हालको अनुमानित मूल्य १ अर्ब ३० करोड डलर रहेको बताइएको छ। कम्पनीले अप्रिल २०२५ मा अमेरिकी डलरसँग आबद्ध स्टेबलकोइन पनि सार्वजनिक गरेको थियो।
यता, ट्रम्प राष्ट्रपति रहँदै आफ्नै लगानी रहेको क्रिप्टो क्षेत्रलाई अनुकूल हुने नीति ल्याउन खोजेको भन्दै स्वार्थको द्वन्द्वको आरोप पनि खेप्दै आउनुभएको छ। तर ह्वाइट हाउसले ती आरोपलाई अस्वीकार गर्दै राष्ट्रपति वा उहाँको परिवार कुनै पनि स्वार्थको द्वन्द्वमा संलग्न नरहेको जनाएको छ। ह्वाइट हाउसकी प्रमुख उपप्रेस सचिव अन्ना केलीले ट्रम्प प्रशासनका सबै निर्णय अमेरिकी नागरिकको हितमा केन्द्रित रहेको र अमेरिकालाई विश्वको “क्रिप्टो राजधानी” बनाउने लक्ष्यअनुसार काम भइरहेको बताउनुभएको छ।
सन् १९७८ को कानुनअनुसार अमेरिकी राष्ट्रपति र उपराष्ट्रपतिले आफ्नो सम्पत्ति तथा आय सार्वजनिक गर्नुपर्ने व्यवस्था छ। यसपटकको विवरणमा प्रथम महिला मेलानिया ट्रम्पले अमेजनका लागि निर्माण गरिएको वृत्तचित्रबाट एक करोड डलरभन्दा बढी तथा आफ्नो पुस्तक “मेलानिया” बाट पाँच लाख डलरभन्दा बढी आम्दानी गरेको उल्लेख छ। ट्रम्पले क्रिप्टो कम्पनीका लगानी, ट्रम्प ब्रान्डका सामग्री तथा गायक ली ग्रीनवुडसँगको सहकार्यमा बिक्री गरिएको बाइबलबाट पनि उल्लेखनीय आम्दानी गरेको विवरणमा जनाइएको छ।
हाल ट्रम्पको सम्पत्ति उहाँका छोरा डोनाल्ड ट्रम्प जुनियरद्वारा सञ्चालित ट्रस्टमार्फत व्यवस्थापन भइरहेको छ। यद्यपि ट्रस्ट विघटन गर्न सकिने कानुनी व्यवस्था रहेकाले सन् २०२९ मा दोस्रो कार्यकाल समाप्त भएपछि ट्रम्पले सम्पत्तिमाथि पुनः प्रत्यक्ष नियन्त्रण लिन सक्ने अवस्था रहेको खुलासामा उल्लेख छ।
यही आर्थिक विवरणमा उपराष्ट्रपति जेडी भान्सले पनि आफ्नो चर्चित संस्मरण “हिलबिली एलेगी” बाट १० लाखदेखि ५० लाख डलरसम्म रोयल्टी प्राप्त भएको जानकारी सार्वजनिक गर्नुभएको छ।
