केलिएन एमबाप्पेले सेनेगलविरुद्ध दुई गोल गर्दै फ्रान्सलाई जित मात्र नभई, विश्व फुटबलमा आफ्नो प्रभावशाली उपस्थिति जनाउनुभएको छ ।
फिफा विश्वकप २०२६ को पहिलो खेलमा दुई गोल गरेसँगै एमबाप्पे फ्रान्सका लागि सर्वाधिक अन्तर्राष्ट्रिय गोल गर्ने खेलाडी बन्नुभएको छ। उहाँले ५८ गोल पूरा गर्दै ओलिभिए जिरुको ५७ गोलको कीर्तिमान तोड्नुभएको हो।
सेनेगलविरुद्धको दुई गोलसँगै एमबाप्पेको विश्वकप गोल संख्या १४ पुगेको छ। योसँगै उहाँले अर्जेन्टिनाका लियोनल मेसी र फ्रान्सका महान् खेलाडी जस्ट फोन्टेनलाई पछि पार्नुभएको छ। मेसी र फोन्टेन दुवैको विश्वकपमा १३–१३ गोल छ।
विश्वकप इतिहासमा सर्वाधिक गोलकर्ताको सूचीमा एमबाप्पे अहिले गर्ड मुलरसँग संयुक्त रूपमा तेस्रो स्थानमा हुनुहुन्छ। शीर्ष स्थानमा रहेका मिरोस्लाभ क्लोजेको नाममा १६ गोल छ भने एमबाप्पे अब त्यो कीर्तिमानभन्दा केवल दुई गोलले मात्र पछाडि हुनुहुन्छ।
सन् २०१८ को विश्वकपमा चार र २०२२ मा आठ गोल गरेका एमबाप्पेले २०२६ को पहिलो खेलमै दुई गोल थप्दै आफ्नो कुल संख्या १४ पुर्याउनुभएको हो। अझै करिअरको उत्कर्षमा रहेका एमबाप्पे विश्वकपको सर्वाधिक गोलकर्ताको कीर्तिमान तोड्ने बलिया दाबेदारका रूपमा देखिनुभएको छ।
सेनेगलविरुद्धको प्रदर्शनले एमबाप्पे फ्रान्सका कप्तान मात्र नभई विश्व फुटबलको नयाँ कीर्तिमानी यात्रातर्फ अघि बढिरहेको संकेत दिएको छ।
