विश्व फुटबलका महानायक लियोनल मेसीले एकपटक फेरि आफ्नो अद्भुत खेलकौशल प्रदर्शन गर्दा अर्जेन्टिनाले फिफा विश्वकप २०२६ अन्तर्गत समूह ‘जे’ को खेलमा अल्जेरियालाई ३–० ले पराजित गरेको छ।
खेलभर अर्जेन्टिनाले बलमाथि नियन्त्रण कायम राख्दै आक्रामक खेल खेल्यो । कप्तान मेसी नै अर्जेन्टिनाको जितका मुख्य नायक बने। उनले उत्कृष्ट ह्याट्रिक गर्दै विश्व फुटबलमा आफ्नो प्रभाव अझ मजबुत बनाएका छन्। मैदानमा उनको गति, पासिङ, ड्रिब्लिङ र गोल गर्ने क्षमताले अल्जेरियन रक्षापङ्क्तिलाई निरन्तर दबाबमा राख्यो।
पहिलो हाफमै अग्रता बनाएको अर्जेन्टिनाले दोस्रो हाफमा थप दुई गोल गर्दै जित सुनिश्चित गर्यो। मेसीको नेतृत्वमा खेलेको अर्जेन्टिनी टोलीले आक्रमण र रक्षाबीच उत्कृष्ट सन्तुलन देखाएको थियो। अल्जेरियाले केही अवसर सिर्जना गरे पनि अर्जेन्टिनाको संगठित खेल अगाडि प्रभाव जमाउन सकेन।
३८ वर्षका मेसीका लागि यो खेल विशेष रह्यो। उनले अन्तर्राष्ट्रिय फुटबलमा अर्को ऐतिहासिक उपलब्धि थप्दै आफ्नो करियरको सुनौलो यात्रालाई अझ स्मरणीय बनाएका छन्। विश्वकपको मञ्चमा उनको प्रदर्शनले अझै पनि उनी विश्वकै उत्कृष्ट खेलाडी रहेको प्रमाणित गरेको छ।
यस जितसँगै अर्जेन्टिनाले समूह चरणमा महत्वपूर्ण तीन अंक जोड्दै नकआउट चरणतर्फ बलियो कदम चालेको छ।
खेलपछि सामाजिक सञ्जालमा मेसीको प्रशंसा व्यापक रूपमा भइरहेको छ। समर्थकहरूले उनको प्रदर्शनलाई “जादुमय”, “अविश्वसनीय” र “फुटबलको कलात्मक नमुना” भन्दै प्रशंसा गरेका छन्।
अर्जेन्टिनाको अर्को खेल अस्ट्रियाविरुद्ध हुनेछ भने अल्जेरियाले पुनरागमनको लक्ष्यसहित जोर्डनको सामना गर्नेछ।
