राष्ट्रपति रामचन्द्र पौडेलसँग प्रतिनिधिसभाका सभामुख डोलप्रसाद (डिपी) अर्यालले बिहीबार राष्ट्रपति कार्यालय शीतल निवासमा शिष्टाचार भेट गर्नुभएको छ।
सभामुखको निजी सचिवालयका अनुसार भेटका क्रममा मुलुकको समसामयिक राजनीतिक अवस्था, सङ्घीय संसद्का गतिविधि, संसदीय अभ्यास तथा लोकतान्त्रिक संस्थाहरूको प्रभावकारी सञ्चालनसँग सम्बन्धित विविध विषयमा विचारविमर्श भएको थियो।
छलफलमा संसद्को वर्तमान गतिविधि, विधेयकहरूको प्रगति, संसदीय प्रक्रियालाई थप प्रभावकारी बनाउने विषय तथा लोकतान्त्रिक शासन प्रणालीलाई सुदृढ बनाउने उपायबारे समेत कुराकानी भएको सचिवालयले जनाएको छ।
राष्ट्रपति पौडेल र सभामुख अर्यालबीच समय–समयमा संवैधानिक निकायहरूबीचको समन्वय, लोकतान्त्रिक मूल्य–मान्यता तथा संसदीय प्रणालीलाई थप सुदृढ बनाउने विषयमा संवाद हुँदै आएको छ। पछिल्लो भेटलाई पनि संवैधानिक संस्थाबीचको नियमित शिष्टाचार तथा समन्वयको निरन्तरताका रूपमा हेरिएको छ।
राष्ट्रपति कार्यालयमा सम्पन्न उक्त भेट सौहार्दपूर्ण वातावरणमा भएको सभामुखको निजी सचिवालयले जनाएको छ।
