युद्धविराम र प्रत्यक्ष वार्ताको चर्चा चलिरहेका बेला रुस–युक्रेन युद्धमा फेरि तनाव बढेको छ। युक्रेनी राष्ट्रपति भ्लोदिमीर जेलेन्स्कीले रुसी राष्ट्रपति भ्लादिमीर पुटिन सँग प्रत्यक्ष भेटवार्ताको प्रस्ताव राखे पनि मस्कोले त्यसलाई अस्वीकार गरेको छ।
रुसी राष्ट्रपति पुटिनले हालको अवस्थामा भेटवार्ताको कुनै औचित्य नरहेको बताउँदै युक्रेनमा आफ्नो सैन्य उद्देश्य पूरा नभएसम्म अभियान जारी रहने संकेत दिएका छन्। युक्रेनले भने युद्धविरामलाई वार्ताको आधार बनाउनुपर्ने अडान दोहोर्याएको छ।
यता बेलायत, फ्रान्स र जर्मनीका नेताहरूले तत्काल युद्धविराम गरी वार्तामा बस्न दुवै पक्षलाई आग्रह गरेका छन्। लण्डनमा भएको उच्चस्तरीय छलफलपछि युरोपेली नेताहरूले युक्रेनको सुरक्षा सुनिश्चित गर्दै स्थायी शान्ति प्रक्रियामा अघि बढ्नुपर्ने बताएका छन्।
कूटनीतिक प्रयास जारी रहे पनि युद्धभूमिमा भने आक्रमण र प्रतिआक्रमण रोकिएको छैन। पछिल्ला दिनहरूमा रुसले युक्रेनमाथि ड्रोन र मिसाइल आक्रमण तीव्र बनाएको छ भने युक्रेनले पनि रुसी सैन्य तथा पूर्वाधार लक्ष्यमा आक्रमण जारी राखेको जनाएको छ।
युद्ध अन्त्यका लागि अन्तर्राष्ट्रिय दबाब बढ्दै गए पनि दुवै पक्ष आफ्नो अडानबाट पछि हट्न नदेखिएकाले तत्काल युद्धविरामको सम्भावना अझै अनिश्चित बनेको विश्लेषण गरिएको छ।
