अन्तरराष्ट्रिय मुद्रा कोष (आइएमएफ) ले विस्तारित कर्जा सुविधा (इसिएफ) कार्यक्रमअन्तर्गत नेपाललाई करिब ४२.९ मिलियन अमेरिकी डलर बराबरको थप सहायता उपलब्ध गराउने निर्णय गरेको छ।
आइएमएफको कार्यकारी बोर्डले जुन ५ मा गरेको समीक्षापछि उक्त सहायता स्वीकृत गरेको हो। आइएमएफले नेपालले आर्थिक सुधार र संरचनात्मक परिवर्तनका क्षेत्रमा उल्लेखनीय प्रगति हासिल गरेको भन्दै सहायता जारी गरिएको जनाएको छ।
आइएमएफका अनुसार मौद्रिक नीतिको कार्यान्वयन प्रणाली सुधार, वित्तीय क्षेत्रको निगरानी सुदृढीकरण, बैंकहरूको ऋण पोर्टफोलियो समीक्षा, सार्वजनिक वित्त व्यवस्थापनमा पारदर्शिता तथा सम्पत्ति शुद्धीकरण नियन्त्रणसम्बन्धी कानुनी र संस्थागत सुधारमा नेपालले सकारात्मक उपलब्धि हासिल गरेको छ।
यद्यपि आर्थिक गतिविधिमा देखिएको सुस्तता, कृषि उत्पादनमा कमी, निजी क्षेत्रको लगानी कमजोर रहनु तथा मध्यपूर्व क्षेत्रमा जारी तनावका कारण चालु आर्थिक वर्ष २०२५/२६ मा नेपालको आर्थिक वृद्धि करिब तीन प्रतिशतमा सीमित रहने प्रक्षेपण आइएमएफले गरेको छ।
यो किस्तासहित इसिएफ कार्यक्रमअन्तर्गत नेपालले प्राप्त गर्ने कुल सहायता रकम करिब ३८४.१ मिलियन अमेरिकी डलर पुगेको छ। सन् २०२२ जनवरीमा सुरु भएको ३८ महिनाको उक्त कार्यक्रम आगामी सन् २०२६ जुलाई ११ सम्म सञ्चालनमा रहनेछ।
नेपालले यस कार्यक्रममार्फत वित्तीय स्थायित्व कायम गर्ने, विदेशी मुद्रा सञ्चिति मजबुत बनाउने, सार्वजनिक वित्त व्यवस्थापन सुधार गर्ने तथा दीर्घकालीन आर्थिक सुधारलाई निरन्तरता दिने प्रतिबद्धता जनाएको छ।
