राष्ट्रिय सतर्कता केन्द्रले सरकारी कार्यालयहरूमा छड्के अनुगमनलाई थप तीव्र बनाएको छ। केन्द्रले दैनिक औसत १० वटा सरकारी कार्यालयमा अनुगमन गर्दै कर्मचारीहरूको कार्यालय समय पालना, निर्धारित पोशाक तथा सेवा प्रवाहसम्बन्धी कार्यशैलीको निगरानी गरिरहेको जनाएको छ।
केन्द्रकी सूचना अधिकारी सरिता खतिवडाका अनुसार पाँचवटा छुट्टाछुट्टै टोली परिचालन गरी हाजिरी, पोशाक, फाइल ट्र्याकिङ तथा कार्यालय अनुशासनसम्बन्धी पक्षहरूको नियमित अनुगमन भइरहेको छ।
केन्द्रले गत साउनयता देशभरका एक हजार १३० सरकारी कार्यालयमा अनुगमन गरेको छ। अनुगमनका क्रममा छ हजार ७१० कर्मचारीले कार्यालय समयको पूर्ण पालना नगरेको तथा एक हजार १६२ कर्मचारी तोकिएको पोशाकविनै कार्यालयमा उपस्थित भएको पाइएको खतिवडाले जानकारी दिनुभयो।
केही कार्यालयमा अवस्था सुधार भए–नभएको मूल्याङ्कन गर्न दुईदेखि तीन पटकसम्म पुनः अनुगमनसमेत गरिएको केन्द्रले जनाएको छ। अनियमितता भेटिएका कर्मचारीविरुद्ध आवश्यक कारबाहीका लागि सम्बन्धित निकायलाई सिफारिस गरिएको छ।
निजामती सेवा ऐन, २०४९ को दफा ५५ अनुसार कार्यालय समय पालना नगर्ने वा निर्धारित आचरण उल्लङ्घन गर्ने कर्मचारीलाई सम्बन्धित कार्यालयले चेतावनी पत्र जारी गर्ने व्यवस्था छ। उक्त चेतावनीको अभिलेख कार्यालयमा राखिने कानुनी प्रावधान रहेको छ।
ऐनअनुसार दुई पटकसम्म चेतावनी प्राप्त गरिसकेका कर्मचारीमाथि विभागीय कारबाहीसमेत गर्न सकिने व्यवस्था छ। केन्द्रले संघीय राजधानीसँगै सातै प्रदेशका चयनित जिल्लामा पनि अनुगमनलाई निरन्तरता दिएको छ। विशेषगरी सेवाग्राहीको चाप बढी हुने र जनसम्पर्क धेरै रहने कार्यालयहरूलाई प्राथमिकतामा राखेर अनुगमन भइरहेको केन्द्रले जनाएको छ।
