टर्कीमा भएको विमान दुर्घटनामा परि लिबियाका सेना प्रमुख लेफ्टिनेन्ट जनरल मोहम्मद अली अहमद अल–हद्दाद सहित पाँच जना उच्च सैनिक अधिकारीको मृत्युु भएको छ ।
टर्कीका गृहमन्त्री अली येरलिकायाका अनुसार फाल्कन ५० प्रकारको व्यावसायिक जेट अङ्काराको एसिनबोगा विमानस्थलबाट स्थानीय समय अनुसार साँझ ८ः१० बजे त्रिपोलीका लागि उडेको थियो । तर केही मिनेटमै पाइलटले हायमाना क्षेत्र नजिक आपतकालीन अवतरणको अनुरोध गरेको र साँझ ८ः५२ बजेपछि सम्पर्क टुटेको जनाइएको छ ।
लिबियाका प्रधानमन्त्री अब्दुल हमिद द्बेइबाहले यो घटनालाई राष्ट्रका लागि “ठूलो क्षति” भएको बताउनुभएको छ ।
टर्कीका सुरक्षाकर्मीहरूले विमानको भग्नावशेष हायमाना जिल्लाको केसिककावाक गाउँ नजिक फेला पारेका थिए । प्रारम्भिक अनुसन्धानले विद्युतीय खराबीलाई दुर्घटनाको सम्भावित कारण बताएको छ, तर तोडफोड वा आक्रमणको सम्भावना नरहेको अधिकारीहरूले स्पष्ट गरेका छन् ।
दुर्घटनामा निधन हुने अन्य लिबियाली अधिकारीहरूमा
स्थल सेनाका प्रमुख मेजर जनरल अल–फितौरी घ्रिबेल,
सैनिक उत्पादन प्राधिकरणका निर्देशक ब्रिगेडियर जनरल महमुद अल–कताउइ,
सेना प्रमुखका सल्लाहकार मोहम्मद अल–असावी दियाब, र
मिडिया कार्यालयका फोटोग्राफर मोहम्मद ओमार अहमद महजुब रहेका छन् ।
विमानमा रहेका तीन चालक दलका सदस्य समेतको निधन भएको अनुमान गरिएको छ ।
सेना प्रमुख अल–हद्दाद हालै टर्कीको उच्चस्तरीय सैनिक भ्रमणमा जानुभएको थियो । मङ्गलबार उहाँले टर्कीका रक्षा मन्त्री यासार गुलेर र सेना प्रमुख सेल्चुक बायराक्तारोग्लुसँग भेट गर्नुभएको थियो । भ्रमणको उद्देश्य दुबै देशबीचको सैनिक तथा सुरक्षा सहकार्य सुदृढ गर्नु रहेको थियो ।
प्रधानमन्त्री द्बेइबाहले घटनाको पूर्ण छानबिनका लागि प्रतिनिधिमण्डल टर्की पठाउने र तीन दिनको राष्ट्रिय शोक घोषणा गर्ने घोषणा गर्नुभएको छ । सन् २०२० देखि सेना प्रमुखको रूपमा कार्यरत अल–हद्दाद लिबियाको स्थिरता र पुनर्निर्माणमा महत्वपूर्ण भूमिकामा रहनुभएको मानिन्छ ।
