वासिङ्टन डीसी । राष्ट्रपति डोनाल्ड ट्रम्पले चिनियाँ समकक्षी सी जिनपिङसँगको सम्भावित उच्चस्तरीय वार्ताबारे आएका अड्कलबाजीहरूलाई खारेज गरेका छन्। सामाजिक सञ्जालमार्फत सार्वजनिक पोस्टमा ट्रम्पले चीन भ्रमण गर्ने कुनै योजना नरहेको र सी जिनपिङलाई भेट्ने कुनै प्रयास पनि नगरिरहेको स्पष्ट पारेका हुन्।

हाल ट्रम्प स्कटल्यान्डमा छन्, जहाँ उनी युरोपेली संघ (EU) सँगको व्यापार सम्झौताबारे छलफल गर्न पुगेका छन्। पोस्टमा उनले लेखेका छन्, ‘म चीन जान्छु, तर यो तब मात्रै हुनेछ जब राष्ट्रपति सिले निम्तो पठाउनेछन्, जुन अझै आएको छैन। अन्यथा, मलाई कुनै चासो छैन।’

ट्रम्प र सी जिनपिङका सहयोगीहरूले दुबै नेताबीच सम्भावित वार्ताबारे छलफल गरिरहेको खबर सार्वजनिक भइसकेको छ। यदि भेटघाट तय भयो भने, ट्रम्पको दोस्रो कार्यकालमा यो दुई नेताबीचको पहिलो प्रत्यक्ष संवाद हुनेछ। यद्यपि हालसम्म भेटको मिति वा स्थानबारे कुनै आधिकारिक निर्णय भइसकेको छैन

दुवै पक्षबीच औपचारिक वार्ताको वातावरण बन्ने संकेत देखिए तापनि, ट्रम्पको पछिल्लो अभिव्यक्तिले तत्कालीन भेटघाटको सम्भावना कमजोर भएको प्रस्ट संकेत गरेको छ।