सरकारले सञ्चालन गरेको किसान सूचीकरण कार्यक्रममा हालसम्म देशभरका करिब २५ लाख किसान दर्ता भएका छन्। किसानको जमिनको स्वामित्व, खेतीयोग्य क्षेत्रफल र उत्पादनको अवस्थाका आधारमा विद्युतीय प्रणालीमार्फत विवरण संकलन गरिएको हो।
कृषि सूचना केन्द्रका अधिकृत सञ्जीव पण्डितका अनुसार कृषि क्षेत्रलाई व्यवस्थित बनाउने तथा किसानलाई लक्षित सेवा र सुविधा प्रभावकारी रूपमा उपलब्ध गराउने उद्देश्यले सूचीकरण अभियान अघि बढाइएको हो।
कृषि जनगणना २०७८ ले देशभर ४१ लाख ३० हजार किसान रहेको देखाएकाले अझै करिब १६ लाख किसानलाई प्रणालीमा समेट्ने काम जारी छ।
मन्त्रालयले सबै किसानको विवरण संकलन भएपछि उनीहरूलाई निर्वाहमुखी, साना, मझौला र ठूला किसान गरी चार वर्गमा विभाजन गर्ने तयारी गरेको छ। त्यसपछि किसान परिचयपत्र वितरण, डिजिटल सूचना प्रणालीसँग आबद्धता र लक्षित कार्यक्रम सञ्चालन गरिनेछ।
परिचयपत्रका आधारमा किसानले मल, बीउ, कृषि अनुदान तथा अन्य सरकारी सेवा–सुविधा सहज रूपमा प्राप्त गर्न सक्ने व्यवस्था गरिने जनाइएको छ।
स्थानीय तहसँगको सहकार्यमा किसानका तथ्यांक संकलन भइरहेको केन्द्रले जनाएको छ। साथै, अझै नाम दर्ता नगरेका किसानलाई सूचीकरण कार्यक्रममा सहभागी हुन आग्रह गरिएको छ।
