जापानमा घट्दो जन्मदरको चुनौती सामना गर्न टोकियो महानगर सरकारले सञ्चालनमा ल्याएको कृत्रिम बौद्धिकता (एआई) आधारित डेटिङ एपले उत्साहजनक नतिजा दिन थालेको छ। सन् २०२४ मा सुरु गरिएको ‘टोकियो एनमुसुबी’ एपमार्फत हालसम्म २६५ जोडी विवाह बन्धनमा बाँधिएका छन्।
विवाह गर्न इच्छुक धेरै नागरिक म्याचमेकिङ प्रक्रियामा सक्रिय नभएको सरकारी अध्ययनपछि उनीहरूलाई उपयुक्त जीवनसाथी खोज्न सहज बनाउने उद्देश्यले यो सेवा सुरु गरिएको हो।
एपमा सहभागी हुन कानुनी रूपमा अविवाहित भएको प्रमाण पेश गर्नुपर्ने, अनलाइन अन्तर्वार्ता उत्तीर्ण गर्नुपर्ने लगायतका मापदण्ड पूरा गर्नुपर्ने व्यवस्था छ। यसले विवाहप्रति गम्भीर उद्देश्य भएका व्यक्तिहरू मात्र सहभागी हुने वातावरण बनाएको सरकारी अधिकारीहरूको भनाइ छ।
यस वर्ष जुन ३० सम्म करिब ३६ हजार आवेदन परे पनि १६ हजार जनाले सदस्यता प्राप्त गरेका छन्। तीमध्ये ७६० जोडी गम्भीर प्रेम सम्बन्धमा रहेका छन् भने २६५ जोडीले विवाह गरिसकेका छन्।
एप प्रयोगकर्ताहरूका अनुसार एआईले रुचि, जीवनशैली र व्यक्तिगत प्राथमिकताका आधारमा सम्भावित जोडीसँगको अनुकूलता विश्लेषण गर्ने भएकाले सही निर्णय लिन सहज भएको छ।
यसैबीच, जापानको स्वास्थ्य, श्रम तथा कल्याण मन्त्रालयका अनुसार सन् २०२५ मा जापानी नागरिकबाट जन्मिएका शिशुको संख्या घटेर ६ लाख ७१ हजार २३६ पुगेको छ, जुन लगातार दशौँ वर्षको गिरावट हो। प्रजनन दर १.१४ मा झरे पनि विवाहको संख्या भने केही बढेको मन्त्रालयले जनाएको छ।
