बागमती प्रदेशको साक्षरता दर ८२.१ प्रतिशत पुगेको छ, जुन राष्ट्रिय साक्षरता दर ७६.२ प्रतिशतभन्दा उल्लेखनीय रूपमा उच्च रहेको छ।
प्रदेशका आर्थिक मामिला तथा योजनामन्त्री प्रभात तामाङका अनुसार चालु आर्थिक वर्षमा मुलुकको आर्थिक वृद्धिदर ३.८५ प्रतिशत रहने अनुमान गरिए पनि बागमती प्रदेशको आर्थिक वृद्धिदर ५.४० प्रतिशत पुग्ने प्रक्षेपण गरिएको छ।
आर्थिक वर्ष २०८२/८३ मा नेपालको कुल गार्हस्थ्य उत्पादन (जिडिपी) रु ६६ खर्ब ९ अर्ब पुग्ने अनुमान गरिएको छ। यसमध्ये बागमती प्रदेशको योगदान ३६.७ प्रतिशत अर्थात् करिब रु २४ खर्ब २३ अर्ब रहने अपेक्षा गरिएको छ।
त्यसैगरी, राष्ट्रिय प्रतिव्यक्ति आय एक हजार ५३५ अमेरिकी डलर रहने अनुमान गरिँदा बागमती प्रदेशको प्रतिव्यक्ति आय सबै प्रदेशमध्ये उच्च, दुई हजार ६४४ अमेरिकी डलर रहने प्रक्षेपण गरिएको छ।
सरकारले सार्वजनिक गरेको आर्थिक वर्ष २०८३/८४ को बजेटअनुसार मुलुकमा निरपेक्ष गरिबी २०.२७ प्रतिशत र बहुआयामिक गरिबी १७.४ प्रतिशत रहेको छ। तर बागमती प्रदेशमा निरपेक्ष गरिबी १२.५९ प्रतिशत तथा बहुआयामिक गरिबी ७ प्रतिशत मात्र रहेको उल्लेख गरिएको छ, जसले प्रदेशको तुलनात्मक रूपमा राम्रो सामाजिक–आर्थिक अवस्थालाई प्रतिबिम्बित गर्छ।
