राजसंस्था पुनर्स्थापनाको साझा लक्ष्यसहित राष्ट्रिय प्रजातन्त्र पार्टीका पूर्वमहामन्त्री डा. धवलशम्शेर राणा र राजावादी अभियन्ता दुर्गा प्रसाईँबीच औपचारिक सहकार्यको घोषणा भएको छ।
दुवै नेताले शुक्रबार आयोजित एक कार्यक्रममा आपसी समझदारीपत्रमा हस्ताक्षर गर्दै आगामी दिनमा संयुक्त रूपमा अघि बढ्ने प्रतिबद्धता व्यक्त गरेका हुन्। समझदारीसँगै प्रसाईँले आफ्नो नेतृत्वमा सञ्चालित ‘नागरिक बचाउ महाअभियान’लाई औपचारिक रूपमा अन्त्य गरिएको घोषणा गरेका छन्।
कार्यक्रममा बोल्दै डा. राणाले राजसंस्था पुनर्स्थापना र राष्ट्रिय एजेन्डालाई केन्द्रमा राखेर नयाँ राजनीतिक शक्ति निर्माणको तयारी भइरहेको जानकारी दिए। उनका अनुसार मलमास सकिएपछि नयाँ दलको औपचारिक घोषणा गरिनेछ।
नयाँ पार्टीको नाम, झण्डा तथा संगठनात्मक संरचनाबारे भने विज्ञहरू र सरोकारवालासँग परामर्श गरेर अन्तिम निर्णय लिइने राणाले बताए।
पछिल्लो समय राजसंस्था पुनर्स्थापनाको पक्षमा विभिन्न समूह र अभियानहरू सक्रिय रहँदै आएका बेला राणा–प्रसाईँबीचको यो सहकार्यलाई राजावादी धारबीचको एकताको प्रयासका रूपमा हेरिएको छ।
