काठमाडौँ । पश्चिम बंगालबाट रोहिंग्या शरणार्थी आउने हल्लापछि, मोरङको जोगबनी नाकामा कडाइ गरिएको छ । पश्चिम बंगालमा नयाँ सरकार बनेसँगै, रोहिंग्या शरणार्थी र अवैध बंगलादेशीलाई निष्काशन गर्ने हल्ला चलेपछि विराटनगर–जोगबनी नाकाको सुरक्षा जाँच कडा बनाइएको हो ।
सामाजिक सञ्जाल र केही आमसञ्चार माध्यममा समेत ‘शरणार्थी पस्तै’ खबर आएपछि, परिचय पत्र हेरेर मात्रै जोगबनी नाकाबाट आउजाउको अनुमति दिन थालिएको हो । रोहिंग्या शरणार्थी नेपाल प्रवेश गर्न सक्ने आशंकाकामा जोगबनी नाकामा निगरानी बढाइएको मोरङ प्रशासनको भनाइ छ।
पश्चिम बंगालको मुस्लिम बहुल जिल्ला माल्दाबाट विराटनगरको रानी–जोगबनीको दूरी १९९ किलोमिटर पर्छ । पश्चिम बंगालसँग सीमा जोडिएको काँकडभिट्टा–पानीट्यांकी नाकामा भने भारतीय सुरक्षाकर्मीले नेपाली नागरिकको परिचयपत्र जाँच्ने गरेका छन् ।
पश्चिम बंगाल विधानसभा चुनाव भाजपाले जितेपछि, सामाजिक सञ्जालमा ‘बंगलादेशी घुसपैठिया र रोहिंग्यालाई लखेट्न थालिएको’ भन्दै भिडियो भाइरल बनाइएको थियो ।
