कारागारमा रहेका कैदीबन्दीले आर्थिक सहयोग र श्रमदान जुटाएर भोटेकोशी बाढी प्रभावित परिवारका लागि राहत सामग्री उपलब्ध गराएका छन् ।
कैदीबन्दीले सोमबार कारागार परिसरमा प्रमुख जिल्ला अधिकारी गणेश अर्याललाई ती सामग्री हस्तान्तरण गरेका हुन् । उनीहरूले डसना, ब्ल्याङ्केट, तन्ना, सिरानी तथा सिरानीका खोल, गम्छा, नङकट, साबुन, दाँत माझ्ने ब्रस, मञ्जन र काइँयो गरी १२५ सेट सामग्री प्रदान गरेका छन् ।
राहतका लागि कैदीबन्दीले प्रतिव्यक्ति १०० देखि २ हजार रुपैयाँसम्म रकम संकलन गर्नुका साथै श्रमदानसमेत गरेका थिए । संकलित रकमबाट ३ लाख ६७ हजार ३६ रुपैयाँ बराबरका सामग्री खरिद गरिएको हो । डसना र सिरानी भने कारागार परिसरमै कैदीबन्दीले श्रमदानमार्फत तयार पारेका थिए ।
प्रमुख जिल्ला अधिकारी अर्यालले कारागार जीवन बिताइरहेका व्यक्तिहरूबाट विपद् प्रभावितका लागि गरिएको सहयोग उदाहरणीय र अनुकरणीय रहेको बताए ।
कारागारमा हाल ७५० जना कैदीबन्दी रहेका छन् । तीमध्ये ७०८ पुरुष र ४२ महिला छन् ।
