अमेरिकाको ह्वाइट हाउस नजिक शनिबार साँझ भएको गोलीकाण्डमा एक बन्दुकधारी सुरक्षाकर्मीको जवाफी कारबाहीमा मारिएका छन् भने एक दर्शक घाइते भएका छन् । घटनाका बेला राष्ट्रपति डोनाल्ड ट्रम्प ह्वाइट हाउसभित्रै रहे पनि उहाँ सुरक्षित रहेको जनाइएको छ ।
युएस सेक्रेट सर्भिसका अनुसार साँझ ६ बजेपछि एक व्यक्तिले झोलाबाट हतियार निकालेर अन्धाधुन्ध गोली चलाउन थालेपछि सुरक्षाकर्मीले तत्काल जवाफी कारबाही गरेका थिए । घाइते अवस्थामा अस्पताल लगिएका संदिग्धलाई चिकित्सकले मृत घोषणा गरेका हुन् ।
अमेरिकी सञ्चारमाध्यमका अनुसार मारिएका व्यक्ति मेरिल्यान्डका २१ वर्षीय नासिरे बेस्ट हुन् । घटनापछि ह्वाइट हाउस आसपासको क्षेत्रलाई कडा सुरक्षा घेरामा राखिएको थियो ।
प्रत्यक्षदर्शीहरूले सुरुमा आतिशबाजी पड्किएको जस्तो आवाज सुने पनि केहीबेरमै गोली चलेको थाहा भएको बताएका छन् । गोलीकाण्डपछि पत्रकार र सर्वसाधारणलाई सुरक्षित स्थानतर्फ सारिएको थियो ।
यस घटनापछि अमेरिकामा राष्ट्रपतिको सुरक्षालाई लिएर फेरि बहस सुरु भएको छ ।
