नेपाली कांग्रेसले क्रियाशील सदस्यता अद्यावधिक (नवीकरण) गर्ने कार्यका लागि अन्तिम पटक समयावधि थप गरेको छ। पार्टीले अब आगामी जेठ २८ गते राति १२ बजेसम्म सदस्यता अद्यावधिक गर्न सकिने जनाएको छ।
कांग्रेस केन्द्रीय कार्यालयका कार्यवाहक मुख्यसचिव कृष्णप्रसाद दुलालका अनुसार सदस्यता व्यवस्थापन केन्द्रीय समितिको बैठकले देशभरबाट प्राप्त सुझाव र मागका आधारमा म्याद थप गर्ने निर्णय गरेको हो।
पार्टीले हालसम्म सदस्यता अद्यावधिक अभियान उत्साहजनक रूपमा अघि बढिरहेको जनाएको छ। तर विभिन्न जिल्ला तथा स्थानीय तहबाट निर्धारित समयभित्र प्रक्रिया पूरा गर्न कठिनाइ भएको जानकारी आएपछि अन्तिम पटकका लागि थप समय उपलब्ध गराइएको दुलालले बताउनुभयो।
उहाँका अनुसार अब थप गरिएको यो अवधि नै अन्तिम हुने भएकाले सम्बन्धित सबै नेता–कार्यकर्ता तथा सदस्यहरूले तोकिएको समयभित्र आफ्नो सदस्यता अद्यावधिक प्रक्रिया अनिवार्य रूपमा सम्पन्न गर्नुपर्नेछ।
कांग्रेसले क्रियाशील सदस्यताको अभिलेखलाई व्यवस्थित, अद्यावधिक र विश्वसनीय बनाउने उद्देश्यले देशव्यापी अभियान सञ्चालन गरिरहेको जनाएको छ।
