संयुक्त राज्य अमेरिकाले क्युवाका राष्ट्रपति मिगुएल डियाज–क्यानेलसहित क्यास्ट्रो परिवारसँग निकट सम्बन्ध भएका व्यक्तिहरूमाथि नयाँ प्रतिबन्ध घोषणा गरेको छ। बिहीबार सार्वजनिक गरिएको यो निर्णयले क्युवा–अमेरिका सम्बन्धमा पुनः तनाव बढाएको छ।
नयाँ प्रतिबन्ध सूचीमा राष्ट्रपति डियाज–क्यानेल, उहाँकी पत्नी, सौतेनी छोरा तथा पूर्वराष्ट्रपति राउल क्यास्ट्रोका परिवारका केही सदस्यहरू परेका छन्। अमेरिकी प्रशासनले उनीहरूलाई क्युवाको राजनीतिक र प्रशासनिक संरचनामा प्रभावशाली भूमिका निर्वाह गर्ने व्यक्तिका रूपमा चित्रण गरेको छ। साथै क्युवाको क्रान्तिकारी सशस्त्र बल मन्त्रालयलगायत केही संस्थामाथि पनि कारबाही गरिएको छ।
अमेरिकाले सन् १९६२ देखि क्युवामाथि व्यापारिक प्रतिबन्ध कायम राख्दै आएको छ। पछिल्ला महिनाहरूमा राष्ट्रपति डोनाल्ड ट्रम्पको प्रशासनले क्युवामाथि थप दबाब सिर्जना गर्ने नीति अघि बढाएको देखिएको छ। वासिङ्टनले क्युवाको कम्युनिस्ट शासनलाई अमेरिकी हित र सुरक्षाका लागि चुनौतीपूर्ण मान्दै आएको छ।
प्रतिबन्धको प्रतिक्रियामा राष्ट्रपति डियाज–क्यानेलले सामाजिक सञ्जाल एक्समार्फत ट्रम्प प्रशासनले दुई देशबीचको अविश्वास र टकरावलाई अझ गहिरो बनाउने प्रयास गरिरहेको आरोप लगाउनुभयो। उहाँले क्युवा बाह्य दबाब र आक्रामक नीतिको सामना गरिरहेको बताउनुभयो।
क्युवाका विदेशमन्त्री ब्रुनो रोड्रिग्जले पनि अमेरिकी कदमको आलोचना गर्दै राष्ट्रिय एकता र दृढताका साथ प्रतिबन्धको सामना गरिने प्रतिक्रिया दिनुभयो।
यता राष्ट्रपति ट्रम्पले क्युवाका नागरिकले राम्रो जीवनस्तर र आधारभूत सुविधा प्राप्त गर्न सक्ने अवस्था देख्न चाहेको बताउनुभएको छ। उहाँले क्युवाको वर्तमान आर्थिक तथा ऊर्जा सङ्कटलाई गम्भीर चुनौतीका रूपमा उल्लेख गर्नुभयो।
पछिल्लो समय इन्धन आपूर्तिमा आएको अवरोधका कारण क्युवामा विद्युत् उत्पादन प्रभावित भएको छ। डिजेल अभावले दैनिक लामो समयसम्म विद्युत् कटौती, खानेपानी समस्या र यातायात सेवामा अवरोध सिर्जना गरेको बताइएको छ।
खाद्यान्न र औषधिको अभाव बढ्दै जाँदा क्युवा मेक्सिको र चीनबाट प्राप्त मानवीय सहयोगमा बढी निर्भर बन्दै गएको छ। यसबीच संयुक्त राष्ट्रसङ्घका प्रतिनिधिहरूले क्यारिबियन क्षेत्रमा आँधीबेहरीको मौसम सुरु भएसँगै क्युवाको मानवीय अवस्था थप जटिल बन्न सक्ने चेतावनी दिएका छन्।
गत वर्षको शक्तिशाली आँधी ‘मेलिसा’ बाट प्रभावित पूर्वी क्युवाका धेरै क्षेत्र अझै पुनर्निर्माण र पुनःस्थापनाको चरणमा रहेका छन्।
