काठमाडौँ । राष्ट्र बैंकको १८ औं गभर्नर नियुक्त भएका पौडेलको जन्म २०३२ सालमा चितवनको रत्ननगर, शान्ति चोकमा भएको हो । आफ्नो बाल्यकाल र स्कुले शिक्षा चितवनकै टाँडीस्थित नेपाल माध्यमिक विद्यालयबाट पूरा गरेका उनले काठमाडौंको अमृत साइन्स क्याम्पस ,अस्कलबाट उच्च माध्यमिक शिक्षा आइ.एस.सी. पूरा गरेका हुन् ।
चीनबाट इन्जिनियरिङ गरेका पौडेलले अमेरिकाको बर्कलीस्थित युनिभर्सिटी अफ क्यालिफोर्नियाबाट एग्रिकल्चरल एन्ड रिसोर्स इकोनोमिक्समा विद्यावारिधि गरेका छन्। पौडेल इतिहास र अर्थशास्त्रबारे विशेष ज्ञान राख्नु हुन्छ ।
पिएचडी गरेर फर्किएका पौडेलले काठमाडौं विश्वविद्यालयमा प्राध्यापन सुरू गरे । वि.सं. २०७२ सालको भूकम्पपछि उनले मिलेनियम च्यालेन्ज कर्पोरेसन एमसिसीमा अर्थशास्त्रीका रूपमा काम गरे । उनले नेपाल उद्योग परिसंघ सि.एन.आई. मा थिंकट्यांक स्थापना गरी प्रमुख आर्थिक सल्लाहकारको भूमिका निर्वाह गरेका थिए । त्यस्तै, अन्तर्राष्ट्रिय श्रम संगठन आइएलओमा पनि उनले सल्लाहकारको जिम्मेवारी सम्हालेका थिए ।
गर्भनर पौडेल नेपाल इकोनोमिक्स ओलम्पियाडको अध्यक्षका साथै सानिमा बैंक र सानिमा मिडिल तमोर हाइड्रोपावर लिमिटेडको सञ्चालक समिति सदस्य पनि भएका थिए । युलेन्स स्कुलको बोर्डमा अभिभावक प्रतिनिधिको भूमिका समेत निर्वाह गरेका छन् ।
वि.सं. २०७८ सालमा, शेरबहादुर देउवा प्रधानमन्त्री भएका बेला पौडेल राष्ट्रिय योजना आयोगको उपाध्यक्ष बनेका थिए । हाल उनी काठमाडौं विश्वविद्यालयमा प्राध्यापन गर्छन् ।
डा. पौडेल चितवन निर्वाचन क्षेत्र नम्बर १ बाट गत ०७९ को चुनावमा नेपाली कांग्रेसको उम्मेवार बनेका थिए । काँग्रेसले चितवन १ मा हाल राष्ट्रिय स्वतन्त्र पार्टीबाट सांसद रहेका पूर्व कांग्रेस निकट अर्थशास्त्री स्वर्णिम वाग्लेलाई टिकट नदिएर पौडेललाई अगाडि सारेको थियो। डा. पौडेल चुनावमा रास्वपाका नव नेता हरि ढकालसँग पराजित भएका थिए ।
चुनाव हारेपछि डा पौडेल पुनः जनता संग जोडिएर काम गर्ने इच्छा पार्टीमा व्यक्त गरेपनि तत्कालका लागि त्यस्तो परिस्थिति नबनेपछि उनले काठमाडौं विश्वविद्यालमा प्राध्यापन सुरु गरेका हुन् । पौडेलले माईक्रोफाईनान्सदेखि श्रम र सामाजिक अर्थशास्त्र र वातावरण र जलस्रोतजस्ता विषयमा अनुसन्धानपत्रहरु प्रकाशित गरेका छन् ।
