काठमाडौँ — नेपाल नगरपालिका सङ्घका अध्यक्ष भीम ढुङ्गानाले संघीय सरकारप्रति कडा आलोचना गर्दै स्थानीय सरकारलाई गैरसरकारी संस्था (एनजीओ) र अन्तर्राष्ट्रिय गैरसरकारी संस्था (आईएनजीओ) सरह व्यवहार गरिएको बताएका छन्।
भूमि ऐन संशोधन विधेयकमाथि छलफल गर्दै ढुङ्गानाले संविधानले स्थानीय तहलाई सरकारको मान्यता दिइसकेको भए पनि व्यवहारमा संघीय सरकार ‘दिने र आफूहरू लिने’ निकायको रूपमा प्रस्तुत भइरहेको बताए।
उनका अनुसार संविधानले स्थानीय तहलाई २२ वटा एकल अधिकार दिएका छन्, जुन अधिकार नै पर्याप्त मानिंदैन, तर ती नै ऐनमार्फत कटौती हुने क्रम बढ्दै गएको छ। “हामीलाई थप अधिकार चाहिएको छैन, तर संविधानले दिएको नै खोस्ने प्रवृत्ति खतरनाक छ,” उनले भने।
ढुङ्गानाले स्थानीय सरकारहरूलाई स्वायत्त र सशक्त बनाउने हो भने कानुनले संविधानको मर्मअनुसार व्यवहार गर्नुपर्ने धारणा राखे।
