स्थानीय बजारमा सुनचाँदीको मूल्यले लगातार उकालो यात्रा जारी राखेको छ । बुधबारको तुलनामा बिहीबार पनि सुन र चाँदी दुवैको भाउ उल्लेख्य रूपमा बढेको हो ।
नेपाल सुनचाँदी व्यवसायी महासङ्घका अनुसार आज छापावाल सुन प्रतितोला रु १ हजार ८०० ले वृद्धि हुँदै रु २ लाख ९८ हजार ६०० पुगेको छ । यस्तै, चाँदीको मूल्य प्रतितोला रु १०५ ले बढेर रु ५ हजार १५५ कायम भएको महासङ्घले जनाएको छ ।
यसअघि बुधबार छापावाल सुन प्रतितोला रु २ लाख ९६ हजार ८०० र चाँदी रु ५ हजार ५० मा कारोबार भएको थियो । मंगलबार भने सुनको मूल्य रु २ लाख ९१ हजार तथा चाँदी रु ४ हजार ८८० कायम रहेको थियो । पछिल्ला तीन दिनमै सुनको मूल्य प्रतितोला करिब रु ७ हजार ६०० ले वृद्धि भएको देखिन्छ ।
अन्तरराष्ट्रिय बजारमा मूल्यवृद्धिको प्रभाव स्थानीय बजारमा पनि परेको व्यवसायीहरू बताउँछन् । अन्तरराष्ट्रिय सञ्चारमाध्यमका अनुसार हाल विश्व बजारमा सुन प्रतिऔँस चार हजार ७०३ अमेरिकी डलर तथा चाँदी ७७ अमेरिकी डलरमा कारोबार भइरहेको छ ।
अन्तरराष्ट्रिय बजारमा बढ्दो माग, अमेरिकी डलरको उतारचढाव तथा भू-राजनीतिक अनिश्चितताका कारण बहुमूल्य धातुको मूल्यमा दबाब बढिरहेको विश्लेषण गरिएको छ । व्यवसायीहरूले आगामी दिनमा पनि सुनचाँदीको मूल्य उच्च रहन सक्ने अनुमान गरेका छन् ।
