सिद्धार्थ हस्पिटालिटी ग्रुप अफ कम्पनीका प्रमुख कार्यकारी अधिकृत (सीईओ) कृष्णप्रसाद न्यौपाने ‘द गभर्नर शिलापत्र वर्ष सीईओ २०८२’ बाट सम्मानित भएका छन्।
शिलापत्रले वर्ष सीईओ चयनका लागि पाँच जनाको नाम मनोनयन गरेको थियो। अन्तिम प्रतिस्पर्धामा न्यौपानेसहित दिनेश थकाली, दीपप्रकाश पाण्डे, मनोज ज्ञवाली र राजनबाबु श्रेष्ठ रहेका थिए।
वर्ष सीईओ छनोटका लागि कुल ३६ हजार ४७ मत प्राप्त भएकोमा न्यौपानेले २६ हजार ५९७ मत अर्थात ७३.७८ प्रतिशत मतसहित उपाधि जितेका हुन्।
सम्मान ग्रहणपछि न्यौपानेले आफूका लागि यो उपलब्धि गौरवको विषय भएको बताएका छन्। उनले आफूलाई योग्य ठहर गर्दै सम्मानित गर्ने शिलापत्र समूह तथा मतदाताप्रति आभार व्यक्त गरे।
उनले भने, “यो केवल एउटा अवार्ड मात्र होइन, नेपाली ब्रान्डप्रति यहाँहरूको अटुट विश्वास र अपेक्षाको प्रतीक हो भन्ने मैले महसुस गरेको छु।”
सिद्धार्थ ग्रुपले देशका विभिन्न प्रमुख सहरमा पाँचतारे लक्जरी होटलदेखि डिलक्स होटल, रेस्टुरेन्ट, रिसोर्ट तथा क्याफे सञ्चालन गर्दै आएको छ। समूहअन्तर्गत पाँचतारे स्तरमा सिद्धार्थ विलासा, चारतारे स्तरमा सिद्धार्थ वैभव तथा तीनतारे स्तरमा सिद्धार्थ बुटिक ब्रान्डमार्फत विभिन्न होटल सञ्चालनमा छन्।
हाल समूहले देशभर ३० वटा आउटलेट विस्तार गरिसकेको छ भने प्रत्यक्ष रूपमा २,५०० भन्दा बढीलाई रोजगारी प्रदान गर्दै आएको छ।
न्यौपानेले शिलापत्रबाट प्राप्त सम्मानले आफूमा थप जिम्मेवारी बढाएको उल्लेख गर्दै नेपालको पर्यटन तथा हस्पिटालिटी क्षेत्रलाई अझ प्रभावकारी बनाउन प्रेरित गरेको बताए।
उनले भने, “यो सम्मानले नेपालको पर्यटन र हस्पिटालिटी क्षेत्रलाई अझ उचाइमा पु¥याउन थप जिम्मेवारी दिएको छ। आगामी दिनमा अझ इमानदारी, समर्पण र नवीन सोचका साथ अघि बढ्ने प्रेरणा मिलेको छ।”
