नक्कली भुटानी शरणार्थी प्रकरणमा जिल्ला अदालत काठमाडौंले तीन वर्षपछि फैसला सुनाएको छ। अदालतले ३० प्रतिवादीमध्ये १६ जनालाई दोषी ठहर गर्दै ७ जनालाई सफाइ दिएको छ। फरार रहेका ७ जनाको मुद्दा भने हाललाई मुलतबीमा राखिएको छ।
दोषी ठहर भएका सात जना अहिले पनि कारागारमा छन्। उनीहरूमध्ये पूर्वगृहसचिव टेकनारायण पाण्डे, पूर्वउपप्रधानमन्त्री टोपबहादुर रायमाझी, इन्द्रजित राई, सागर राई, सन्देश शर्मा, केशव दुलाल र सानु भण्डारीलाई चार वर्ष कैद र ४० हजार रुपैयाँ जरिवानाको सजाय सुनाइएको छ। उनीहरूले पुनरावेदन गरे पनि तत्काल कारागारबाट छुट पाउने छैनन्।
प्रतिवादी प्रतिक थापाले भने सफाइ पाएका छन्। बेचन झालाई एक वर्ष कैद र १० हजार रुपैयाँ जरिवाना तोकिए पनि उनले तोकिएकोभन्दा बढी समय जेलमा बिताइसकेकाले रिहा भएका छन्।
पूर्वगृहमन्त्री बालकृष्ण खाँण, टेकनाथ रिजाल, गोविन्द चौधरी, आङटावा शेर्पालगायत अन्य दोषी ठहर भएका प्रतिवादी भने हाल थुनाबाहिर छन्। कानुनी व्यवस्थाअनुसार उनीहरूले उच्च अदालतमा पुनरावेदन गर्दा तत्काल जेल जानुपर्ने छैन। अब जिल्ला अदालतको फैसलाको पूर्णपाठ आएपछि दुवै पक्षले उच्च अदालतमा पुनरावेदन गर्न सक्नेछन्।
