कांग्रेसले प्रदेशमा एमालेसँगको सत्ता सहकार्य तोड्ने, नेकपासँग नयाँ समीकरणको तयारी

नेपाली कांग्रेसले सातै प्रदेशमा नेकपा एमालेसँगको सत्ता सहकार्य अन्त्य गर्ने निर्णय गरेको छ। कांग्रेसले अब नेपाली कम्युनिस्ट पार्टी नेकपासँग नयाँ सत्ता समीकरणका लागि संवाद अघि बढाएको छ।
सानेपामा बसेको कांग्रेस पदाधिकारी बैठकले प्रदेशमा एमालेसँग सहकार्य कायम राख्न नसकिने निष्कर्ष निकालेको हो। कांग्रेसका अनुसार प्रदेश सरकार सञ्चालनका क्रममा देखिएका असहयोग र राजनीतिक मतभेदका कारण यस्तो निर्णय गरिएको हो।
निर्णयसँगै कर्णाली प्रदेश सरकारबाट कांग्रेस बाहिरिएको छ भने सुदूरपश्चिममा मुख्यमन्त्री कमल शाहले एमालेका मन्त्रीलाई बर्खास्त गरेका छन्। कोशी, बागमती, गण्डकी र लुम्बिनी प्रदेशमा पनि एमालेसँगको सत्ता सहकार्य बिहीबारसम्म अन्त्य गर्ने तयारी कांग्रेसको छ।
यसैबीच, कांग्रेसका सभापति गगन थापा र नेकपाका अध्यक्ष पुष्पकमल दाहाल ‘प्रचण्ड’बीच प्रदेश सरकार गठनबारे छलफल भएको छ। दुवै दलबीच सत्ता सहकार्यका विषयमा सकारात्मक संवाद भएको नेताहरूले बताएका छन्।
यता, नेकपाले कांग्रेस र एमाले दुवैसँग संवाद भइरहेको जनाएको छ। एमालेले भने कांग्रेसले पार्टीलाई एक्ल्याउने रणनीति अपनाएकाले सत्ता सहकार्यमा समस्या आएको प्रतिक्रिया दिएको छ।