बर्खायाममा उडान सुरक्षालाई थप सुदृढ बनाउन नेपाल नागरिक उड्डयन प्राधिकरण (क्यान) ले मनसुन अवधिभर सञ्चालन हुने हेलिकोप्टर उडानका लागि विशेष सुरक्षा व्यवस्था लागू गरेको छ।
प्राधिकरण अन्तर्गतको उडान सुरक्षा मापदण्ड विभागले जारी गरेको मनसुन सर्कुलरअनुसार मेडिकल उद्धार (एयर एम्बुलेन्स) बाहेकका सबै हेलिकोप्टर उडानमा अब अनिवार्य रूपमा दुई जना पाइलट रहने व्यवस्था गरिएको छ।
प्राधिकरणले मनसुनका बेला मौसममा हुने तीव्र परिवर्तन, दृश्यता कम हुने अवस्था तथा आकस्मिक जोखिमलाई मध्यनजर गर्दै यस्तो निर्णय गरेको जनाएको छ।
सर्कुलरअनुसार उडानअघि पाइलट तथा डिस्प्याचरले हेलिकोप्टरको प्राविधिक अवस्था, न्यूनतम आवश्यक उपकरण (मिनिमम इक्विपमेन्ट लिस्ट) को उपलब्धता तथा कार्यक्षमता अनिवार्य रूपमा जाँच गर्नुपर्नेछ। साथै, उडान मार्ग, गन्तव्य विमानस्थल र वैकल्पिक विमानस्थलको मौसमसम्बन्धी सम्पूर्ण जानकारी लिएर मात्र उडान सञ्चालन गर्नुपर्ने व्यवस्था गरिएको छ।
प्राधिकरणले मनसुन अवधिमा उडान सुरक्षाप्रति कुनै पनि प्रकारको लापरबाही नगर्न सबै हेलिकोप्टर सेवा प्रदायक कम्पनी तथा सम्बन्धित सरोकारवालालाई निर्देशन दिएको छ। यस व्यवस्थाले चुनौतीपूर्ण मौसमका बीच यात्रु तथा चालकदलको सुरक्षा सुनिश्चित गर्न महत्वपूर्ण भूमिका खेल्ने विश्वास गरिएको छ।
