स्मार्टफोन ब्रान्ड अनरले नेपाली बजारमा आफ्नो नयाँ स्मार्टफोन सिरिज ‘अनर ६००’ र ‘अनर ६०० प्रो’ सार्वजनिक गरेको छ। अत्याधुनिक कृत्रिम बुद्धिमत्ता (एआई) प्रविधि, आकर्षक डिजाइन र शक्तिशाली क्षमतासहित ल्याइएको यो सिरिजले दैनिक क्षणलाई अझ जीवन्त र सिर्जनात्मक बनाउने कम्पनीले जनाएको छ।
अनर नेपालका अनुसार नयाँ सिरिज आधुनिक जीवनशैलीलाई ध्यानमा राखेर निर्माण गरिएको हो। फोटो तथा भिडियो निर्माणदेखि दैनिक प्रयोगसम्म सहज अनुभव दिने उद्देश्यसहित यसलाई बजारमा ल्याइएको कम्पनीको भनाइ छ।
तस्वीरलाई भिडियोमा बदल्ने सुविधा
अनर ६०० मा स्न्यापड्रागन ७ जेन ४ प्रोसेसर प्रयोग गरिएको छ, जसले छिटो र प्रभावकारी कार्यसम्पादन दिने कम्पनीले जनाएको छ। यसमा रहेको ‘एआई इमेज टु भिडियो २.०’ फिचरले साधारण तस्वीरलाई पाँच सेकेन्डको एआई भिडियो कथामा परिवर्तन गर्न सक्छ।
फोनमा ‘मुभिङ फोटो इरेजर’ र ‘अल्ट्रा क्लियर नाइट मोड’ जस्ता विशेषता पनि समावेश छन्। यी सुविधाले कम उज्यालोमा समेत स्पष्ट र आकर्षक तस्वीर खिच्न सहयोग गर्ने कम्पनीको दाबी छ।
यसमा सात हजार एमएएच क्षमताको ब्याट्री रहेको छ। साथै ८० वाट फास्ट चार्जिङ र २७ वाट रिभर्स चार्जिङ सुविधा पनि उपलब्ध छ।
अनर ६०० को मूल्य
- ८ जीबी र्याम + २५६ जीबी स्टोरेज : ८४ हजार ९९९ रुपैयाँ
- १२ जीबी र्याम + २५६ जीबी स्टोरेज : ८९ हजार ९९९ रुपैयाँ
यो फोन खरिद गर्ने ग्राहकले १५ हजार ९९९ रुपैयाँ मूल्य बराबरको ‘अनर च्वाइस वाच २ प्रो’ निःशुल्क प्राप्त गर्ने कम्पनीले जनाएको छ। साथै ‘इफिक्स प्रोटेक्सन सेवा’ पनि उपलब्ध हुनेछ।
अनर ६०० प्रोमा शक्तिशाली क्यामेरा
अनर ६०० प्रोमा स्न्यापड्रागन ८ इलिट प्रोसेसर प्रयोग गरिएको छ। कम्पनीका अनुसार यसले अझ छिटो कार्यसम्पादन, शक्तिशाली एआई क्षमता र प्रिमियम अनुभव प्रदान गर्छ।
यसमा पनि ‘एआई इमेज टु भिडियो २.०’ फिचर उपलब्ध छ, जसले तस्वीर र लेखिएका शब्दको आधारमा एआई भिडियो सामग्री तयार गर्न सक्छ।
फोटोग्राफीका लागि यसमा २०० मेगापिक्सेल मुख्य क्यामेरा, ५० मेगापिक्सेल टेलिफोटो लेन्स र १२ मेगापिक्सेल अल्ट्रावाइड क्यामेरा राखिएको छ। कम्पनीका अनुसार यसले जुम, कम उज्यालो तथा विभिन्न अवस्थाका तस्वीरमा उत्कृष्ट नतिजा दिन्छ।
फोनमा सात हजार एमएएच ब्याट्री, ८० वाट तारयुक्त चार्जिङ, ५० वाट वायरलेस चार्जिङ र २७ वाट रिभर्स चार्जिङ सुविधा उपलब्ध छ।
