नेपाल र भारतबीच डिजिटल माध्यमबाट रकम आदान–प्रदानलाई सहज बनाउने उद्देश्यसहित नबिल बैंकले नयाँ सीमापार रेमिट्यान्स सेवा सञ्चालनमा ल्याएको छ। सेवामार्फत दुवै देशका ग्राहकहरूले बैंकिङ एप प्रयोग गरेर छिटो र सुरक्षित रूपमा रकम पठाउन तथा प्राप्त गर्न सक्नेछन्।
नयाँ व्यवस्थाअनुसार नबिल बैंकका ग्राहकहरूले मोबाइल बैंकिङ प्लेटफर्म ‘एनबैंक’ मार्फत नेपालबाट भारत तथा भारतबाट नेपाल रकम पठाउन सक्नेछन्। बैंकले यो सेवाले पारिवारिक सहायता, व्यक्तिगत भुक्तानी तथा साना वित्तीय कारोबारलाई थप सहज बनाउने जनाएको छ।
बैंकका प्रमुख कार्यकारी अधिकृत मनोजकुमार ज्ञवाली ले डिजिटल बैंकिङलाई अझ प्रभावकारी बनाउने अभियानअन्तर्गत यो सेवा सुरु गरिएको बताउँदै सीमापार कारोबारलाई छिटो, सुरक्षित र भरपर्दो बनाउने विश्वास व्यक्त गरे।
नेपालबाट भारततर्फ दैनिक १५ हजार भारतीय रुपैयाँसम्म तथा मासिक १ लाख भारतीय रुपैयाँसम्म पठाउन सकिने व्यवस्था गरिएको छ। भारतबाट नेपाल रकम पठाउँदा भने दैनिक २ लाख भारतीय रुपैयाँसम्मको सीमा तोकिएको छ।
नेपालको नेपाल क्लियरिङ हाउस लिमिटेड (एनसीएचएल) र भारतको Unified Payments Interface (यूपीआई) बीचको सहकार्यमा सञ्चालनमा आएको यो सेवाले दुई देशबीचको डिजिटल वित्तीय सम्पर्कलाई थप मजबुत बनाउने अपेक्षा गरिएको छ।
