नेपाल क्रिकेट संघ क्यानले सन् २०२६ का लागि राष्ट्रिय क्रिकेट खेलाडीको नयाँ वर्गीकरण र पारिश्रमिक सार्वजनिक गरेको छ ।
क्यानले महिलातर्फ २५ र पुरुषतर्फ ३८ खेलाडीलाई विभिन्न श्रेणीमा समेट्दै मासिक तलब तथा म्याच फी निर्धारण गरेको हो ।
क्यानले महिलातर्फ खेलाडीलाई चार समूहमा वर्गीकरण गर्दै मासिक २५ हजारदेखि ५५ हजार रुपैयाँसम्म पारिश्रमिक तोकेको छ । समूह ‘ए’मा कप्तान इन्दु बर्मा, उपकप्तान पूजा महतो, रुविना क्षेत्री र सीता रानामगर छन् । सबैले प्रतिमहिना ५५ हजार रुपैयाँ पाउनेछन् ।
पुरुषतर्फ भने क्यानले पहिलोपटक ‘ए प्लस’ श्रेणी थपेको छ । यसमा कप्तान रोहितकुमार पौडेल, दीपेन्द्रसिंह ऐरी र सन्दीप लामिछाने छन् । सबैले मासिक एक लाख २० हजार रुपैयाँ पाउनेछन् । ‘ए’ श्रेणीका कुशल भुर्तेल, सोमपाल कामी, करण केसी र आसिफ सेख ले मासिक एक लाख रुपैयाँ पाउनेछन् ।
पुरुष खेलाडीले एकदिवसीय खेलमा प्रतिम्याच १५ हजार र टी–२० अन्तर्राष्ट्रियमा १० हजार रुपैयाँ म्याच फी पाउने व्यवस्था छ । महिलातर्फ टी–२० आई खेल्दा प्रतिखेल १० हजार रुपैयाँ प्रदान गरिने क्यानले जनाएको छ ।
क्यानका अनुसार यसपटक सबै श्रेणीका खेलाडीको मासिक पारिश्रमिक पाँच हजार रुपैयाँले बढाइएको छ भने डेभलपमेन्ट श्रेणीमार्फत नयाँ तथा सम्भावना बोकेका खेलाडीलाई पनि सम्झौतामा समेटिएको छ ।
