काठमाडौंको नयाँ बसपार्क क्षेत्रमा रहेको एक गेस्ट हाउसमा एक युवती मृत अवस्थामा फेला परेकी छन्। प्रहरीका अनुसार उनको हत्या भएको प्रारम्भिक अनुसन्धानबाट खुलेको छ।
जिल्ला प्रहरी परिसर काठमाडौंका एसपी पवनकुमार भट्टराईका अनुसार २५ वर्षीया निशा सुनार आइतबार गेस्ट हाउसको कोठाभित्र मृत अवस्थामा फेला परेकी हुन्।
गेस्ट हाउस सञ्चालकले कोठाबाट दुर्गन्ध आउन थालेपछि प्रहरीलाई जानकारी गराएका थिए। त्यसपछि घटनास्थल पुगेको प्रहरी टोलीले शव फेला पारी अनुसन्धान सुरु गरेको हो।
मृतक निशा सुनार कैलालीको धनगढी उपमहानगरपालिकाकी स्थायी बासिन्दा रहेको प्रहरीले जनाएको छ।
प्रहरीले घटनामा संलग्न व्यक्तिको खोजी कार्य तीव्र बनाएको जनाएको छ। घटनाबारे थप अनुसन्धान जारी रहेको छ।
मृतकको शव पोस्टमार्टमका लागि त्रिभुवन विश्वविद्यालय शिक्षण अस्पताल, महाराजगञ्जमा राखिएको प्रहरीले जनाएको छ।
